Монголын хөрөнгийн биржид шинээр бүртгэгдсэн "МОНГОЛ БАЗАЛЬТ" ХК нээлттэй хувьцаат компани болж, нийт хувьцааны 30 хувийг олон нийтэд санал болгож буйтай холбогдуулан үнэт цаасыг олон нийтэд нээлттэй танилцуулах арга хэмжээ 2018 оны 5 дугаар сарын 12-ны өдөр Best Western Premier Туушин зочид буудлын Соёмбо танхимд амжилттай зохион байгуулагдлаа. 

Арга хэмжээнд нийт 500 гаруй иргэд оролцож, компанийн олон жилийн хугацаанд боловсруулсан техник технологийн инноваци болох чулуун хөвөн бүтээгдэхүүнүүдийг үзэж сонирхсоноос гадна компанийн цаашдын төлөвлөгөөтэй танилцсан байна. 

Үүсгэн байгуулагч Л.Ариунболд арга хэмжээний үеэр нийт хөрөнгө оруулагчдад хандан "“Монгол Базальт" ХК нь бизнесийн ололт, амжилтаа Монголын ард түмэн, хөрөнгө оруулагч бизнес эрхлэгчидтэй хамтран эзэмших боломжийг нээж, оруулсан хөрөнгө оруулалтаар дараагийн шинэ үе рүү орох тэсрэлтийг хийхээр өнөөдөр IPO гаргаж байна. Таны оруулсан хөрөнгө оруулалт зөвхөн өөрт чинь эдийн засгийн ашиг болж орохоос гадна Монгол Улсын хөгжил, манай улс Төв Азидаа экспортлогч орон болох, Улаанбаатар хотын агаарын бохирдлыг шийдэх, айл бүр аюулгүй орчинд амьдрах шинэ боломж нээгдэх зэрэг олон асуудлыг шийдэхэд хувь нэмэр болно” хэмээн онцоллоо.

МОНГОЛЫН ХӨРӨНГИЙН БИРЖ