Өнөөдөр буюу 2022 оны 06 дугаар сарын 29-ний өдрийн Засгийн газрын хуралдаанаар “Монголын хөрөнгийн бирж” ТӨХК-ийн 34 хувийг олон нийтийн болгох тогтоол, шийдвэр дэмжигдлээ.

Хуралдааны үеэр Монгол Улсын Ерөнхий сайд Л.Оюун-Эрдэнэ “Шинэ сэргэлтийн бодлого”-ын хүрээнд төрийн өмчит компаниудыг олон нийтийн хяналтад оруулах ажлыг эрчимжүүлж, улмаар хөрөнгийн зах зээлийн хөгжлийг дэмжихийг холбогдох сайд, албан тушаалтнуудад үүрэг болгосон юм. Ингэснээр Монголын хөрөнгийн бирж олон улсын жишгээр олон нийтийн хувьцаат компани болж, хөгжлийн дараагийн шатандаа хүрэх боломж бүрдэж байна.

Мөн өнөөдийн хуралдаанаар хөрөнгийг биржээр дамжуулан төрийн мэдлийн хувьцааг нээлттэй худалдах, олон нийтийн хяналтад шилжүүлэх төрийн өмчит 25 хуулийн этгээдийн жагсаалтыг баталлаа.   

2022-2023 онд Монголын хөрөнгийн биржээр нээлттэй худалдах, олон нийтийн хяналтад оруулах төрийн өмчийн хуулийн этгээдийн жагсаалтад “Монголын хөрөнгийн бирж” ТӨХК-иас гадна “Монголын цахилгаан холбоо” ХК, “Мэдээлэл холбооны сүлжээ” ХХК, “Мэдээлэл технологийн үндэсний парк” ТӨҮГ болон авто зам арчлалтын компаниуд багтлаа.

МОНГОЛЫН ХӨРӨНГИЙН БИРЖ